चिकित्सकको लाइसेन्स परीक्षामा किन हुन्छन् ५० प्रतिशतमा भन्दा कम पास ?
काठमाडौँ । नेपाल मेडिकल काउन्सिलले चिकित्सकको लागि लिने लाइसेन्स परीक्षामा ५० प्रतिशतमा भन्दा कम पास हुने गरेको आकडाले देखाउँछ । चिकित्साशास्त्र अध्ययन सकाएर अभ्यास गरी उत्तीर्ण भएपछि मात्रै चिकित्सकको दर्ता प्रमाणपत्र लाइसेन्सको परीक्षण दिन पाइन्छ ।
वर्षमा तीन पटक लिइने लाइसेन्स परीक्षाको नतिजा केलाउँदा निराशाजनक छ । काउन्सिलले लिएको ६४औँ परीक्षासम्ममा स्नातक तहको दर्ता प्रमाणपत्र परीक्षामा सन् २०२२ मा ४२ प्रतिशत मात्रै उत्तीर्ण भएका छन् । ५ हजार ६ सय ८७ जना लाइसेन्स परीक्षामा सहभागी भएकोमा २ हजार ३ सय ८६ मात्रै उत्तीर्ण भएका थिए ।
Advertisement
स्वदेश, विदेश जहाँ चिकित्सा शिक्षा अध्ययन गरे पनि मापदण्ड पुरा नगरी चिकित्सक बन्न पाइँदैन । लाइसेन्स परीक्षामा ५० प्रतिशत भन्दा कम उत्तीर्ण हुँदा चिकित्साशास्त्र अध्यापन गराउने कलेजको शैक्षिक प्रणालीमा प्रश्न उठाउन आवश्यक रहेको काउन्सिलका एक अधिकारीले बताए ।
उनी भन्छन्, ‘चिकित्सक लाइसेन्स परीक्षामा अनुत्तीर्ण हुने मुख्य कारण कलेजहरूमा गुणस्तरीय शिक्षा बनाउन मापदण्ड पालना गरे नगरेको बारे चासो नराख्दा यस्तो समस्या सिर्जना भएको हो ।’
लाइसेन्स परीक्षामा सहभागी भई फेल भइसकेपछि काउन्सिलले कडा खालको प्रश्न सोध्यो भनेर आलोचना गर्ने प्रवृत्ति रहेको काउन्सिलका रजिष्ट्रार डा.कृष्ण अधिकारी सुनाउँछन् । उनका अनुसार काउन्सिलले सोध्ने नसोध्ने प्रश्न सोध्यो भनेर चर्को आलोचना गरेको पाइन्छ ।
लाइसेन्स परीक्षासम्बन्धी आलोचनालाई निमिट्यान्न पार्न काउन्सिलले दर्ता प्रमाणपत्र (लाइसेन्स) परीक्षामा सोधिने प्रश्नको मानक अर्थात् स्ट्यान्डरवाइज कम्प्युटरमार्फत गरिने तयारी गरेको छ । आइटम एनालाइसिल अर्थात् विषयको विश्लेषण गरिने काउन्सिलका रजिष्ट्रार डा अधिकारीले बताए ।
नेपाल मेडिकल काउन्सिलले लिने चिकित्सकका लागि लाइसेन्स परीक्षामा १८० वटा प्रश्न सोधिन्छ । जसमा ५० प्रतिशत अर्थात् ९० वटा प्रश्नको सही उत्तर मिलाएमा लाइसेन्स परीक्षा पास भइन्छ ।
‘यो परीक्षा पास गर्न सयमा/सय मिलाउनुपर्छ भन्ने हुँदैन । तर, डाक्टरले सकेसम्म मिलाउनुपर्छ ।’ उनले भने, ‘बिरामीको शल्यक्रिया गरी निको बनाउने अति गम्भीर अनि संवेदनशील कार्य भएकाले लाइसेन्स परीक्षामा ५० प्रतिशत प्रश्नको जवाफ सही दिन सक्ने हुनैपर्छ ।’
लेखकबाट थप
खबर पढेर तपाईलाई कस्तो महसुस भयो ?
